(61)
جو پاکی بن پاک ماہی دے پاکی جان پلیتی ھُو
ہک بت کانے واصل ہوئے ہک خالی رہے مسیتی ھُو
عشق دی بازی لئی جنہاں سر دیندیاں ڈھل نہ کیتی ھُو
دوست نہ ملدا باہو جنہاں ترٹی چوڑ نہ کیتی ھُو
(62)
جو دل منگے تھیوے کتھوں تھیون رہیا پریرے ھُو
دوست نہ دیوے دل دا دارو عشق نہ واگاں پھیرے ھُو
اس میدان محبت دے وچ ملسن تاءتکھیرے ھُو
قربان تنہاں توں باہو جنہاں رکھیا قدم اگیرے ھُو
(63)
جو دم غافل سو دم کافر مرشد ایہہ پڑھایا ھُو
سنیا سخن گئیاں کھلہ اکھیں چت مولا ول لایا ھُو
کیتی جان حوالے رب دے ایسا عشق کمایا ھُو
مرن تھیں اگے مرگئے باہو تاں مطلب نوں پایا ھُو
(64)
جے توں وحدت رب دی مل مرشد دیاں تلیان ھُو
مرشد لطفوں کرے نظارہ گل تھیون سب کلیاں ھُو
گلاں وچوں ہک لالہ ہوسی گل نازک گل پھلیاں ھُو
دوہیں جہانیں مٹھے باہو جنہاں سنگ دو ڈلیاں ھُو
(65)
جے رب نہاتیاں دھوتیاں ملدا، ملدا ڈڈواں مچھیاں ھُو
جے رب ملدا مون منایاں ملدا بھیڈاں سسیاں ھُو
جے رب جتیں ستیاں ملدا ملدا ڈانڈاں خصیاں ھُو
رب اوہنا نوں ملدا باہو نیتاں جنہاں اچھیاں ھُو
(66)
ج جس الف مطالعہ کیتا ب دا باب ن ہ پڑھدا ھُو
چھوڑ صفاتی لدھس ذاتی عامی دور چاکردا ھُو
نفس امارہ کتڑا جانے ناز نیاز نہ دھردا ھُو
کیا پروا تنہاں باہو جنّہ گھاڑو لدھا گھر دا ھُو
(67)
ج جے دین علم وچ ہونا سر نیزے کیوں چڑھدے ھُو
اٹھاراں ہزار جو عالم آہا اگے حسین دے مردے ھُو
جے کر بیعت رسولی مندے پانی کیوں بند کردے ھُو
صادق دین تنہاںباہو جو سر قربانی کر دے ھُو
(68)
جیں دل عشق خرید نہ کیتا سو دل بخت نبختی ھُو
اُستاد ازل دے بق پڑھایا ہتھ دتس دل تختی ھُو
پر سرآیاں دم نہ ماریں جاں سر آوے سختی ھُو
پڑھ توحید تھیوسے باہو سبق پڑھیوے وقتی ھُو
(69)
جیں دل عشق خرید نہ کیتا سو دل درد نہ پھٹی ھُو
اس دل تھیں سنگ پتھر چنگے جو دل غفلت اٹی ھُو
جیں دل عشق حضور نہ منگیا سو در گاہوں سُٹی ھُو
ملیا دوست نہ باہو چوڑ نہ کیتی ترٹی ھُو
(70)
جیں دل عشق خرید نہ کیتا سو دل درد نادانے ھُو
خنثے خسرے ہر کوئی آکھے کون آکھے مردانے ھُو
گلیاں دے وچ پھرن ہر ویلے جنگل ڈھور دیوانے ھُو
مرداں دی کل پوسی باہو عاشق بنھسن گانے ھُو
(71)
جیں دینہ دا میں در تینڈے تے سجدہ صحی ونج کیتا ھُو
اس دینہ دا سر فدا اُتھائیں میں بیا در نہ لیتاھُو
سردیون سرآکھن ناہیں شوق پیالہ پیتا ھُو
قربان تنہاں تو ں باہو جنہاں عشق سلامت کیتا ھُو
(72)
جیونے کیہہ جانن سار مویاں دی سو جانے جو مردا ھُو
قبراں دے وچ ان نہ پانی خرچ وڑیندا گھر ھُو
اک وچھوڑا ماں پیو بھائیاں بیا عذاب قبردا ھُو
واہ نصیبہ باہو جیہڑا وچ حیاتی مردا ھُو
(73)
جیوندیاں مر رہنا ہووے ویس فقیراں بہیئے ھُو
جے کوئی سٹے گودڑ کوڑا وانگ اروڑی یہئے ھُو
گلہ الانبھا بھنڈی خواری یار دے پاروں سیہئے ھُو
قادر دے ہتھ ڈوراساڈی باہو جیوں رکھے تیوں رہیئے ھُو
(74)
چناں کر رشنائی تارے ذکر کریندے تیرا ھُو
تیرے جیہے چن کئی سے چڑھدے سجناں باجھ انہیرا ھُو
جتھے چن اساڈا چڑھدا قدر نہیں کجھ تیرا ھُو
جنم گوایا جس کارن باہو یار ملے اک ویرا ھُو
(75)
چڑھ چنا تے کر رشنائی ذکر کریندے تارے ھُو
گلیاں دے وچ پھرن نمانے لعلاں دے ونجارے ھُو
شالا مسافر کوئی نہ تھیوے ککھ جنہاں توں بھارے ھُو
تاڑی مار اڈا نہ باہو آپ اڈن ہارے ھُو
(76)
حافظ پڑھ پڑھ کرن تکبر ملاں کرن وڈیائی ھُو
ساون مانہہ دے بدلاں وانگوں پھرن کتاباں چائی ھُو
جتھے ویکھن چنگا چوکھا پڑھن کلام سوائی ھُو
دوہیں جہانیں مٹھے باہو کھادی ویچ کمائی ھُو
(77)
خام کیہہ جانن سار فقر دی محرم ناہیں دے دے ھُو
آب مٹی تھیں پیدا ہوئے خامی بھانڈے گِل دے ھُو
قدر کیہہ جانن لعل جواہراں جو سوداگر بل دے ھُو
ایمان سلامت باہو جہیڑے بھج فقراں ملدے ھُو
(78)
د دلے وچ دل جو آکھیں سو دلدار دلیلوں ھُو
دل دا دور اگوہاں کیجے کثرت کنوں قلیلوں ھُو
قلب کمال جمالوں جسموں جوہر جاہ جلیلوں ھُو
قبلہ قلب منور باہو خلوت خاص خلیلوں ھُو
(79)
درد اندر دا اندر ساڑے باہر کراں تاں گھائل ھُو
حال اساڈاکویں اوہ جانن جو دنیا تے مائل ھُو
بحر سمندر عشقے والا ہر دم ویہندا حائل ھُو
پہنچ حضور آسان نہ باہو نام تیرے دے سائل ھُو
(80)
درد منداں دا خون جو پیندا برہوں باز مریلا ھُو
ھاتی دے وچ کیتس ڈیرا شیر بیٹھا مل بیلا ھُو
ہاتھی مست سندھورے وانگوں کردا پیلا پیلا ھُو
پیلے دا وسواس نہ باہو پیلے باجھ نہ میلا ھُو
No comments:
Post a Comment