(41)
پیر مِلے جے پیڑ نہ جاوے اس نوں پیر کیہہ دھرنا ھُو
مشد ملیاں ارشاد نہ من نُوں افوہ مرشد کیہہ کرنا ھُو
ہادی کنوں ہدایت ناہیں اوہ ہادی کیہہ پھڑنا ھُو
سردتیاں حق حاصل باہو اس موتوں کیہہ ڈرنا ھُو
(42)
تارک دنیا تد تھیوسے فقر ملیوسے خاصہ ھُو
راہ فقر دا تد لدھیوسے ہتھ پکڑیوسے کاسہ ھُو
دریا وحدت نوش کیتوسے اَجاں بھی جی پیاسا ھُو
راہ فقر رَت روون باہو لوکاں بھانے ہاسا ھُو
(43)
تدوں فقیر شتابی بندا جان عشق وچ ہارے ھُو
عاشق شیشہ نفس مُربی جان جاناں توں وارے ھُو
خود نفسی چھڈ ہستی جھیڑے لاہ سِروں سب بھارے ھُو
مویاں باجھ نہیں حاصل باہو سئے سئے سانگ اتارے ھُو
(44)
تَسبیح پھری تے دل نہ پھریا کیہہ لینا تسیبح پھڑ کے ھُو
علم پڑھیا تے ادب نہ سِکھیا کیہہ لینا علم نوں پڑھ کے ھُو
چِلے کَٹے تے کُجھ نہ کھٹیا کیہہ لینا چلیاں وڑ ک ھُو
جاگ بناں دُدھ جمدے نہ باہو لال ہوون بھانویں کڑھ کے ھُو
(45)
تسبیح داتوں کسبی ہویوں ماریں دم ولیاں ھُو
من دا منکا ہک نہ پھیریں کانج پائیں پنج ویہاں ھُو
دین نہ لگے گل گھوٹو آوی لین لگے جھُت شِینہاں ھُو
پتھر چت جِنہاں دے باہو ضائع وسنا مِیننہاں ھُو
(46)
تُلہا بنہ توکل والا ہو مردانے تریئے ھُو
جیس دکھ تھیں سُکھ حاصل ہووے اس تھیں مول نہ ڈریئے ھُو
اِنَّ مَعَ العُسرِ یُسرًا آیا چت اوسے ول دھرئیے ھُو
بے بروا درگاہے باہو رو رو حاصل بھرئیے ھُو
(47)
تن من یار دا شہروسایا بنایا دل وچ خاص محلہ ھُو
آن الف دل وسّوں کیتی ہوئی خوب تسلّا ھُو
سب کجھ مینوں پیاسنیوے جو بوے سو اللّٰہ ھُو
درد منداں ایہہ رمز پچھاتی باہو بے درداں بھلا ھُو
(48)
توڑے تنگ پرانے ہوون گجھے نہ رہندے تازی ھُو
مار نقارہ دل وچ وڑیا کھیڈ گیا اِک بازی ھُو
مار دلاں نوں جُول دلونیں تکے نین نیازی ہُو
اوہناں نال کیہہ تھیا باہو جنہاں یار نہ راضی ھُو
(49)
توں تاں جاگ نہ جاگ فقیرا انت نوں لوڑ جگایا ھُو
اکھیں میٹیاں نہ دل جاگے جاگے مطلب پایا ھُو
ایہہ نکتہ جداں کیتا پختہ ظاہر آکھ سنایا ھُو
میں تاں بھلی ویندی باہو مرشد راہ وکھایا ھُو
(50)
ثابت صدق تے قدم اگیرے تاں ای رب لبھیوے ھُو
لوں لوں دے وچ ذکر اللّٰہ دا ہر دم پیا پڑھیوے ھُو
ظاہر باطن عین عیانی ھُو ھُو پیا سنیوے ھُو
نام فقیر تنہاں دا باہو قبر جنہاں دی جیوے ھُو
(51)
ثابت عشق تنہاں لدھا جنہاں ترٹی چوڑ چا کیتی ھُو
نہ اوہ صوفی نہ صافی نہ سجدہ کرن مسیتی ھُو
خالص نیل پرانے تے نہیں چڑھدا رنگ مجیٹھی ھُو
قاضی آن شرع ول باہو عشق نماز نہ نیتی ھُو
(52)
جال جلیندیاں جنگل بھوندیاں ہکا گل نہ پکی ھُو
چِلے چلیہے حج گزاریاں دل دی دوڑ نہ ڈکی ھُو
تریہے روزے پنج نماشاں ایہہ بھی پڑھ پڑھ تھکی ھُو
سبھے مراداں حاصل باہو نظر مہر دی تکی ھُو
(53)
ج جاں ذات نہ تھیوے باہو تاں کم ذات سدیوے ھُو
ذاتی نال صفاتی ناہیں تاں تاں حق لبھیوے ھُو
اندر بھی ھُو باہر بھی ھُو باہو کتھ لبھیوے ھُو
جیں اندر حب دنیا باہو مول فقیر نہ تھیوے ھُو
(54)
جب لگ کودی کریں خود نفسوں تب لگ رب نہ پاویں ھُو
شرط فنا نوں جانیں نہیں نام فقیر رکھاویں ھُو
موئے باجھ نہ سوہندی الفی ایویں گل وچ پاویں ھُو
نام فقیر تد سوہندا باہو جیوندیاں مرجاویں ھُو
(55)
جتھے رتی عشق وکاوے مناں ایمان دویوے ھُو
کتب کتاباں ورد وظیفے اوتر چا کچیوے ھُو
باجھوں مرشد کجھ نہ ھاصل راتیں جاگ پڑھیوے ھُو
مرئیے مرن تھیں اگے باہو تاں رب حاصل تھیوے ھُو
(56)
جد دا مرشد کاسہ دتڑا تد دی بے پروائی ھُو
کیہہ ہویا جے راتیں جاگے مرشد جاگ نہ لائی ھُو
راتیں جاگیں کیں عبادت نندیا ڈینہ پرائی ھُو
کوڑا تخت دنیا دا باہو فقر سچی بادشاہی ھُو
(57)
جس دل اسم اللّٰہ دا چمکے عشق بھی کردا ہلے ھُو
بھر کستوری چھپدے ناہیں دے رکھیئے سے پلے ھُو
انگلیں پچھے دینہ نہیں چھپدے دریا نہ رہندے ٹھلہے ھُو
اسیں اوسے وچ اوہ اساں وچ باہو یار سولے ھُو
(58)
جنگل دے وچ شیر مریلا باز پوے وچ گھر دے ھُو
عشق جیہا صراف نہ کوئی کج نہ چھوڑے زر دے ھُو
عاشقاں نیندر بھکھ نہ کائی عاشق مول نہ مردے ھُو
عاشق جیندے تداں باہو جد صاحب اگے سردھردے ھُو
(59)
جنہاں شوہ الف تھیں پایا پھول قرآن نہ پڑھدے ھُو
مارن دم محبت والا دور ہویو نیں پردے ھُو
دوزخ بہشت غلام تنہاں دے چاکیتونیں بردے ھُو
قربان تنہاں دے باہو جیہڑے وحدت دے وچ وڑدے ھُو
(60)
جنہاں عشق حقیقی پایا مونہوںنہ کجھ الاون ھُو
ذکر فکر وچ رہن ہمیشہ دم نوں قید لگاون ھُو
نفسی قلبی روحی سری اخفی خفی کماون ھُو
قربان تنہاں توں باہو جہیڑے اکس نگاہ جگاون ھُو
No comments:
Post a Comment