(21)
ایہہ دنیا رن حیض پلیتی کیتی مَل مل دھوون ھُو
دنیاکارن عالم فاضل گوشے بہہ بہہ روون ھُو
جِیں دے گھر وچ بہتی دنیا اوکھے گھُکَر سوون ھُو
ترک دنیاں جنہاں کیتی باھو واہندے نکل کھلوون ھُو
(22)
ایہو نفس اساڈا بیلی جو نال اساڈے سِدھا ھُو
زاہد عالم آن نِواے ٹکڑا ویکھے تِھدھا ھُو
جو کوئی اس دی کرے سواری نال اللّٰہ اس لِدھا ھُو
راہ فقر دا مشکل باھو مان نہ سِیرا رِدّھا ھُو
(23)
باجھ حضوری نہیں منطوری توڑے پڑھن صلاتاں ھُو
روزے نفل نمازاں گزارن جاگن ساریاں راتاں ھُو
باجھوں قلب حضور نہ ہووے کڈھن سئے زکاتاں ھُو
باجھ فنا رب حاصل باہو نہ تاثیر جَماتاں ھُو
(24)
باہو باغ بہاراں کِھڑیا نرگس ناز شرم دا ھُو
دل وچ سہی کیتوسے پاکوں پاک پرم دا ھُو
طالب طلب طواف تمامی حب حضور حرم دا ھُو
گیا حِجاب تھیوسے حاجی بخشیُوس راہ کرم دا ھُو
(25)
بغداد شریفے ونج کراہاں سودا نینہ کیتوسے ھُو
رتی عقل دے کراہاں بھار غماں دا گھدوسے ھُو
بھار بھریرا منزل چوکھیری اوڑک ونج پُہنتیوسے ھُو
ذات صفات سہی کیتوسے باہو جمال لدھوسے ھُو
(26)
بنہ چلایا طرف زمین دے عرشوں فرش ٹکایا ھُو
گھر تھیں ملیا دیس نکالا لکھیا جھولی پایا ھُو
رَہ نی دُنیا نہ کر جھیڑا اگے دل گھبرایا ھُو
اَس پردیسی وطن دوراڈا باہو اَلم سوایا ھُو
(27)
بے ادبں نہ سار ادب دی نال غیراں دے سانجھے ھُو
جیہڑے ہانہہ مِٹی دے بھانڈے کدی نہ ہونے کَانجھے ھُو
جیہڑ ±ے مُڈھ قدیم دے کھیڑے ہوون کدی نہ رانجھے ھُو
جَیں حضور نہ منگیا باہو گئے جہانیں وانجھے ھُو
(28)
ب بزرگی ویہن لوڑھائیے ملئے رج مکالا ھُو
لَااِلٰہ گل گہنا مڑھیا مذہب کِیہ لگدا سَالا ھُو
اِلَّا اللّٰہ گھر میرے آیا آن لہایا پالا ھُو
پیالا خضروں پیتا باہو آب حیاتی والا ھُو
(29)
ب ت پڑھ کے فاضل ہوئے الف نہ پڑھیا کِسے ھُو
جِیں پڑھیا تیں شوہ نوں لَدّھا جاں پڑھیا کُجھ تِسّے ھُو
چوداں طبق کرن رُشنائی اَنھیاں کجھ نہ دِسّے ھُو
باجھ وصال اللّٰہ دے باہو سب کہانیاں قِصے ھُو
(30)
ب بسم اللّٰہ اسلم اللّٰہ دا ایہہ بھی گہنا بھارا ھُو
نال شفاعت سرور عالم چھُٹسی عالم سارا ھُو
حدوں بے حد درود نبی نوں جیں دا یڈ پسارا ھُو
قربان تِنہاں توں باہو جنہاں ملیا نبی سُہارا ھُو
(31)
ب بغداد دی کیا نشانی اُچیاں لمیاں چیراں ھُو
تن من میرا پرزے پرزے جیوں درزی دیاں لیراں ھُو
لیراں دی گل کفنی پاکے رلساں سنگ فقیراں ھُو
بغدادے ٹُکڑے منگساں باہو کرساں مِیراں مِیراں ھُو
(32)
ب بہتی میں اوگن ہاری لاج پئی گل اس دے ھُو
پڑھ پڑھ علم کریہن تکبر شیطان جیہے اُتھ مُسدے ھُو
لکھاں نوں بھو دوزخ والا ہک بہشتوں رُسدے ھُو
عاشقاں دے گل چھُری ہمیشہ باہو اگے محبوباں کُسدے ھُو
(33)
پاٹا دامن ہویا پُرانا کچرک سِیوے درزی ھُو
ھال دا محرم کوئی نہ ملیا جو ملیا سو غرضی ھُو
باجھ مُربّی کِسے نہ لدھی گجھی مرض اندر دی ھُو
اوسے راہ ول جائیے باہو جس تھیں خلقت ڈردی ھُو
(34)
پاک پلیت نہ ہونے توڑے رہندے وچ پلیتی ھُو
وحدت دے دریا اُچھلے ہک دل سہی نہ کیتی ھُو
ہک بت خانے واصل ہوئے ہک پڑھ پڑھ رہے مسیتی ھُو
سُٹ فضیلت بیٹھے باہو عشق نماز جاں نیتی ھُو
(35)
پڑھ پڑھ عالم کرن تکبر مُلاں کرن وڈیائی ھُو
گلیاں دے وچ پھرن نمانے بغل کتاباں چائی ھُو
جِتھے ویکھن چنگا چوکھا پڑھن کلام سوائی ھُو
دوہیں جہانیں مُٹھے باہو کھادی ویچ کمائی ھُو
(36)
پڑھ پڑھ علم مشائخ سداون کرن عبادت دوہری ھُو
اندرجھگی پئی لٹیوے تن من خبر نہ موہری ھُو
مولا والی سدا سکھالی دل توں لاہ تکوری ھُو
باہو رب تنہاں نوں حاصل جنہاں جگ نہ چوری ھُو
(37)
پڑھ پڑھ علم مُلوک ریجھاون کیا ہویا اس پڑھیاں ھُو
ہر گز مکھن مُول نہ آوے پھٹے دُدھ دے کڑھیاں ھُو
آکھ چنڈورا ہتھ کیہ آئیوس انگوری پھڑیاں ھُو
ہک دل خستہ رکھیں باہو لئیں عبادت وَرھیاں ھُو
(38)
پڑھیا علم وھی مغروری عقل بھی گیا تلوہاں ھُو
بھُلا راہ ہدایت والا نفع نہ کیتا دوہاں ھُو
سِر دتیاں جے سِر ہتھ آوے سودا ہار نہ تُونہاں ھُو
وڑیں بازار محبت باہو رہبر لے کئی سُونہا ھُو
(39)
پڑھ پڑھ علم ہزار کتاباں عالم ہوئے بھارے ھُو
حرف عشق دا پڑھ نہ جانن بھُلے پھرن بچارے ھُو
عشق عقل وچ منزل بھاری سئیاں کوہاں دے پاڑے ھُو
جنہاں عشق خرید نہ باہو دوہیں جہانیں مارے ھُو
(40)
پنجے محل پنجاں وچ چانن ڈیواکِت ول دھریئے ھُو
پنجے مَہر پنجے پٹواری حاصل کِت ول بھریئے ھُو
پنج اِمام تے پنجے قبلے سجدہ کِت ول کریئے ھُو
صاحب جے سِر منگے باہو ہر گز ڈِھل نہ کریئے ھُو
No comments:
Post a Comment